^{சட்டம் [புதுக் கவிதை]} 

^{சட்டம் ஒரு விலங்கு.}                 

^{அது பணக்காரர்களிடம்}

^{வாலைக் குழைக்கும்.}

^{ஏழைகளின் மீது  விழுந்து பிடுங்கும்.}

^{நீதி தேவதை ஒரு காந்தாரி.}

^{குற்றவாளிகளுக்காக}

^{கண்களைக் கட்டிக் கொண்டவள்.}

^{குற்றவாளிகளை வளர்த்து}

^{தருமத்தைக் காட்டுக்கனுப்புகிறாள்.}

^{அரசியல் சகுனிகள் அவள் சகோதரர்கள்.}

^{அவர்களின் பகடைகள் உருளும்பொழுது}

^{அவர்கள் விரும்பும் தீர்ப்பை வழங்குகிறாள்.}

 

^{காந்தாரி ஒரு கற்புக்கரசி.}

^{கணவனுக்காக கண்களைக் கட்டிக் கொண்டவள்.}

^{அவள் கண்கள் திறந்திருந்தால்}

^{துரியோதனன் திருந்தி இருப்பான்.} 

 

^{சுயநலக்காரர்கள்}

^{நீதி தேவதையின்  கண்களைக் கட்டிவிட்டு}

^{தேசத்தைத் துகிலுரிகிறார்கள்.}

^{இன்று கண்களைக் கட்டிகொண்டிருக்கும்}

^{நீதி தேவதை கற்புக்கரசியா?}

^{விலை போகாதவளா?}

^{நீதி சபையில்}

^{உட்கார்ந்திருக்கும் அனைவரும் உத்தமர்களா?}

^{நல்லவர்கள் என்று நாடு சொல்லும்}

^{வீட்டுமர்களாலும்}

^{விதுரர்களாலும்}

^{துரோணர்களாலும்}

^{என்ன செய்ய முடிந்தது?}

^{குற்றவாளிகளுக்கு வக்கீல்கள்}

^{கடவுளர்களாகத் தெரிகிறார்கள்.}

^{இத்தேசத்தின் புகழ்பெற்ற வக்கீல்கள்}

^{பெரும்பாலோர்}

^{ஊழல்வாதிகளுக்காகத்தானே}

^{வாதிடுகிறார்கள்.}       

^{சட்டத்தின் சந்துபொந்துகளை}

^{தெரிந்து வைத்திருக்கிற} 

^{அவர்களுடைய மேதைமை}

^{ஊழல் பெருச்சாளிகளுக்குத்தானே}

^{உதவுகிறது.}

 

^{தருமத்தின் வாழ்வதனைச் சூது கவ்வும்;}

^{தருமம் மறுபடியும் வெல்லும்;}

^{பாரதியின் வரிகள்  பாடாய்ப்படுவதுதான் மிச்சம்.}

^{சிறைக்குச் செல்லும் அரசியல் குற்றவாளிகள்}

^{அனைவரும் இதைச் சொல்ல ஆரம்பித்துவிட்டார்கள்.}

 

^{நீதி தேவதை தன்}

^{கண்களால் பார்க்க முடியாது என்பதால்}

^{அவள் சாலையைக் கடக்க}

^{யாரேனும் கைப்பிடித்து அழைத்துச் செல்ல நேரிடுகிறது.}

^{சில நல்லவர்கள் உதவுவதால்}

^{இப்படிச் சில நன்மைகளும் நடக்கின்றன.} 

 

^{நீதி தேவதை}

^{தன் செவிகளை மட்டுமே நம்பிஇருக்கிறாள்.}

^{அதனால் ஒலிப்பது}

^{உண்மையின்  குரலா}

^{போலியின் குரலா என்பது}

^{அவளுக்குத் தெரியாமல் போகிறது.}

^{அவள் கையில் தராசைக் கொடுத்துவிடுவதால்}

^{அவளுக்கு வியாபார நோக்கம்}

^{வந்து விடுகிறது.}

 

^அவள்

^{கண்களைக் கட்டாதீர்கள்!}

^{அவள் கைகளில்}

^{தராசைக் கொடுத்து விட்டு}

^{கால்கடுக்க நிற்க வைக்காதீர்கள்.}

^{அவள் சிம்மாசனத்தின் மீது}

^{கம்பீரமாக வீற்றிருக்க வேண்டும்.}

^{அவள் கண்கள் நீதி சபையை}

^{நன்றாகக் கவனிக்கட்டும்.}

^{அவள் இட்டபணியை}

^{செவ்வனே செய்யும் பணியாட்களை}

^{நியமியுங்கள்.}

^{அவளைக் காக்க வலிமையான படை வேண்டும்.}

^{அவளுக்கு சுதந்திரமான}

^{ஒற்றர் படை வேண்டும்.}

^{அந்தப் படைகள்}

^{அரசாங்கத்தின் படைகளன்று.}

^{அவளுக்கென்று சொந்தமான படை.}

 

^{அவளுக்கு விஞ்ஞானத்தின்}

^{அத்துணை வசதிகளும் வேண்டும்.}

^{அவள் அரண்மனையில்}

^{வைக்கப்படும் எந்த ஆவணங்களும்}

^{களவு போகக் கூடாது.}

^{அவள் வேலையாட்கள்}

^{தாங்கள் அப்பழுக்கற்றவர்களா}

^{என்பது சோதித்தறியப் படவேண்டும்.}

^{அவளுக்குத் தெரியாமல்}

^{ஓர் அணுவும் அசையக் கூடாது.}

^{அவளுடைய ஆணைக்கு}

^{ஆண்டவனே அஞ்ச வேண்டும்.}

                                                

                                                    ^{—-அரங்க குமார்}

                                                           ^{சென்னை – 600 049.}